2019年金球獎正式落幕，美斯成功第六度奪獎成史上最佳。除美斯成焦點外，今屆金球獎同時亦有不少有趣嘅數字或事件可以分享，HOMME 特別為大家盤點一下。
1. 美斯六奪金球獎
今屆最大主角當然係六奪金球獎嘅美斯。呢位阿根延球王於2017年被C朗拿度追平五次得獎記錄後再次超越死敵，以六次金球獎史上最多正名為「史上最佳」球員。
2. 巴塞超皇馬 成最多次獲金球獎球會
美斯奪獎過後，以巴塞球員身份捧走金球獎嘅次數將會達到12次，正式超越宿敵皇家馬德里嘅11次。巴塞奪獎嘅包括美斯(6次)、告魯夫(2次)、蘇亞雷斯(1960年)、史杜捷哥夫、李華度及朗拿甸奴各一次。
3. 皇家馬德里近14年首次缺席金球獎前十名
「銀河艦隊」去屆表演失色，今屆最後30人名單只有賓施馬、夏薩特入選。如果剛效力皇馬不久嘅夏薩特只得第13名，而賓施馬位列第26名，自2005年來首次金球獎頭十名沒有皇馬球員。
4. 杜奧巴、麥巴比十年後補影合照
球迷應該都還記得巴塞與車路士嘅「北京電視機」事件。原來當年麥巴比為該名賽事嘅球僮之一，當時杜奧巴因不滿賽果而於比賽後拒絕與麥巴比合照。十年後嘅今日，杜奧巴於頒獎禮上主動向麥巴比發出邀請，以填補呢位新星十年前嘅遺憾。
5. 雲迪克笑指C朗並非其對手
有記者於頒獎禮問雲迪克:「對於C朗缺席今次頒獎禮，是否覺得少一個對手去擔憂？」。呢位利物浦中堅竟然回答指「C朗真係我對手？」，串爆言論於網絡掀起一場討論。
