Sky Sports News 報導，西甲勁旅馬體會已經向賓菲加作出一份高達1.26億歐元嘅報價以收購中場祖奧菲歷斯。
馬體會今季於西甲雖然壓過同市宿敵皇馬排名第二，但其實早早已經失去奪冠嘅機會，未算達到球會目標。於歐戰場上，馬體會今季亦未如理想，十六強次回合被C朗狂轟3球反勝，早早出局。雙線失利下，若馬體會目標為更好成績絕對需要投放更多資源。
除成績因素外，馬體會頭號球星基沙文早早已確認今夏會離隊，而近日亦有報導指車路士將會於今夏收回前鋒莫拉達，故鋒線上亦確實需要作出補充，以免令本季入球能力已不算強嘅馬體會攻力再減退。
至於祖奧菲歷斯 Joao Felix，有玩過 Football Manager 嘅朋友應該都非常熟悉。呢位19歲嘅葡萄牙新星今季開始慚露鋒芒，全季共交出15個入球及9個助攻並獲得各豪門關注。今季最受人注目一戰為於對陣法蘭克福嘅歐霸八強賽事，祖奧菲歷斯於該場賽事中大演帽子戲法及交出一個助攻，除令佢成為歐洲賽史上最年輕嘅連中三元球員外，亦令佢身價再度飆升。
賓菲加已經於葡萄牙證券市場確認收到馬體會為祖奧菲歷斯作出嘅報價，而該報價已確認為1.26億歐元。若賓菲加最後接受該報價嘅話，19歲嘅祖奧菲歷斯將成為史上第5高轉會費嘅球員，僅次於尼馬﹑麥巴比﹑古天奴及奧士文尼迪比利。
