作為阿仙奴傳奇教練，雲加於執教兵工廠22年間為球隊贏得三個英超冠軍。雲加當時作為世界頂級教頭之一，當然有唔少豪門想要挖角，該法國教練近日終於大方承認曾不下一次拒絕「銀河艦隊」皇家馬德里嘅邀請。
雲加近日受 beIN SPORTS 訪問時被問到當年被指有機會執教皇馬一事，雲加指出:「如果話有後悔，可能係因為當時我認為對球會忠誠比贏得冠軍重要而有輕微嘅犧牲，或許我認為慢慢一步步建立球隊或者於球隊中有更多話事權更重要。」
「當時我選擇於球會興建新球場時繼續建立阿仙奴嘅陣容，但事實上其實我可以選擇去另一個地方贏得更多冠軍，同時亦會更少財政上嘅限制。不過直到最後，我仍然對我所做嘅事感到高興。我由年輕嘅時候已經開始希望可以真正熱愛自己嘅工作，我每天都會問自己”到底我做得好還是不好?”。」
「當我係阿仙奴嘅時候，我認為球會可以滿足我工作嘅需要，呢樣係我想繼續工作嘅原因。面對皇馬邀請時，我認為無需轉變呢個處景。雖然可能會獲得更多榮譽，但工作可能未必有如於阿仙奴般愉快，亦有可能於皇馬會有較少影響力。所以我最後決定繼續留隊，延續與阿仙奴嘅愛的故事。」
雲加於贏得三座英超冠軍後，連續十四年都未能帶領球隊贏得重要錦標，最後黯然離隊。雖然雲加離開阿仙奴時酋長球隊彌漫住一段「Wenger Out」嘅聲音，但相信有唔少槍迷心中都一直感謝呢位曾經為兵工廠帶來光輝，又與球隊捱過興建球場艱難時刻嘅傳奇教頭。
