(此文仍根據目前之傳會消息撰寫 箇中真偽 自行判斷)
28歲嘅世界盃冠軍成員基沙文昨夜正式宣佈，將會離開效力5年嘅馬德里體育會，或以1.2億歐元違約金轉會巴塞。基沙文效力馬體會5年期間，上陣256次攻入133球，每季都為球會攻入20球以上，為馬體會歷來第五射手。此外，此法國鋒將更曾助馬體會捧起歐霸盃、歐超盃、殺入歐聯決賽等等，若離隊勢必對馬體會造成極大影響，預計馬體會將會簽入同等級數球星以作補充，將引起轉會市場大變動。以下盤點基沙文離開馬體會或會引起之連鎖反應:
1. 基沙文 Antoine Griezmann
年齡: 28歲
國籍: 法國
轉會可能: 馬體會 -> 巴塞隆拿
預計轉會費: 1.2億歐元
上個夏天已經有指巴塞有意羅致基沙文，但當時呢位球星為表忠誠決意再留球會，望能帶領馬體會更上一層樓。可惜今季馬體會成績並無大進，雖於西甲獲得亞軍，但歐聯又遭祖記翻盤成功早早十六強出局，難免令呢位目標成為世界最佳嘅球星心淡。除此以外，今季季後基沙文好友高甸亦會離隊，而新星盧卡斯靴南迪斯亦將轉投拜仁。眼看馬體會實力不進反退，基沙文尋求轉會亦係無可口非。而基沙文要達成世界最佳，又要加盟對自身有興趣嘅球會，看來轉會巴塞隆拿已經係唯一選擇。
2. 戴巴拿 Paulo Dybala
年齡: 25歲
國籍: 阿根廷
轉會可能: 祖雲達斯 -> 馬體會
預計轉會費: 1億歐元
自早兩天傳出基沙文將轉會巴塞時，外媒就已經有報導指馬體會將會以戴巴拿作基沙文嘅取代者。呢位阿根廷翼鋒自C朗加盟後上陣機會大減，今季過得實在唔太如意。今季戴巴拿於意甲只交出5個入球，比起上季攻入22球大大減少，更於唔少大戰亦只能屈居後備，有離心亦係理所當然。雖然此子今季表現一般，但其潛力及能力都係有目共睹，若馬體會可給予一定嘅上陣機會絕對會有表現回報，轉會或會係雙贏局面。
3.古天奴 Philippe Coutinho
年齡: 26歲
國籍: 巴西
轉會可能: 巴塞隆拿 -> 曼聯/車路士
預計轉會費: 1億歐元
古天奴原本於利物浦呼風喚雨，當時為更進一步尋求轉會巴塞卻鑄成大錯。呢位巴西翼鋒今季於西甲上陣34場，只能交出5入球2助攻，表現令球迷大失所望。古天奴今季屢於魯營遭自己球迷柴台，加上基沙文即將加盟，要走似成定局。但基於古天奴當時以1.42億鎊加盟，以現今狀態實難再賣原價。有指巴塞於基沙文加盟後已鐵定心清走呢位前利記球星，將以1億歐元蝕本價放回其熟悉嘅英超戰場 – 曼聯/車路士。
4.山齊士 Alexis Sanchez
年齡: 30歲
國籍: 智利
轉會可能: 曼聯 -> 國米
預計轉會費: 未知(曼聯或需承擔一半工資)
對紅魔而言，當年從與曼城爭奪搶走山齊士可謂一大錯誤。先不論其表現乏善可陳，其高昂薪金已令紅魔整隊工資架構受嚴重損害。今夏曼聯不少球員未能續約，或多或少都與呢位智利球星有關，曼聯要清走佢確係克不容緩。假如文上屬實，曼聯真簽入古天奴嘅話更只會加劇呢位智利翼鋒離隊。有指目前紅魔正與國米商討今夏或將此子送到米蘭，而為求清理門戶曼聯甚至願意承擔一半工資，以求解救球隊苦況。
以上只為目前有報導嘅轉會消息，基沙文作為現今少數世界級球星轉會絕為牽一髮動全身。今夏轉會市場未開幕已有此爆炸性轉會，接下來幾個月看來只會更加震憾，球迷可拭目以待。
