曼聯急於清走山齊士已非新鮮事，早前就有報導指國米願意以一半薪金租借收留呢位失意翼鋒，不過近日似乎又有新發展。
據外媒報導指除國米外，意甲豪門祖雲達斯亦對山齊士有濃厚興趣，不過目前進度仍係國米處於領先地位。國米對山齊士加盟一事希望係直接收購而非租借，而原先曼聯負擔一半薪金方案則會變成免費轉會，同時山齊士亦需接受減薪。
對曼聯而言，當時羅致山齊士並沒花一分一毫，只係用於球隊不受重用嘅米希達恩交換而來。而山齊士於曼聯最大問題就係其薪金與表現不符令其他球員不服，甚至紛紛要求極誇張嘅薪金續約，故紅魔即使要零轉會費清走呢個負擔都定必接受。而就山齊士嚟講，今年30歲嘅佢雖然可以不花任何氣力享受50萬周薪至2022年，但於曼聯確令佢職業生涯跌至最低點，若持續落去約滿後亦難尋出路，故降薪重返意甲發展亦不失為一個好方案。
始終呢位智利鋒將都曾顯示過其極高嘅個人能力，國米若能用零轉會加上一個合理嘅薪金收購山齊士亦不應為一個好嘗試，實為三贏方案。據報山齊士經理人已經與國米，甚至祖記接觸中，為球員謀定出路。降薪對山齊士無可避免，曼聯放人亦毫無難度，目前只在於薪金降幅有多少，而追求山齊山嘅意甲球會又能否接受。
