今季被曼聯租借至國米嘅山齊士早前於代表智利出戰友誼賽時再次受傷，國米官方宣佈山齊士目前已完成手術，將會缺席三個月比賽。
山齊士上星期於對陣哥倫比亞時左腳足踝脫臼，智利教練魯尼達曾表示傷勢非常嚴重，並表示需等待球會決定是否接受手術，因開刀後至少需兩至三個月後方可復原。
據報國際米蘭與曼聯商討後，早前已證實山齊士為左腳踝關節腓骨長肌腱損傷，並順利完成手術，預計於明年一月方可復出。
山齊士自加盟曼聯以來備受批評，超高薪下為紅魔上陣45場只攻入五球，與阿仙奴時期平均每2場有一球進帳相差頗大。獲租借到國米後本來似乎有所改善，為「藍黑兵團」上陣4場已交出一入球、一助攻，可惜現時又再受傷病困擾。
於干地嘅352陣容下，該智利球星擔任前鋒嘅角色重要性遠比於曼聯時高，山齊士是否能再獲一次翻生機會似乎要睇干地於一月時選擇等待佢，抑或是於轉會窗再買人了。
