過去十年美斯、C朗稱霸球壇，包辦各個大大小小獎項，風頭一時無兩。雖然摩迪去年打破兩人壟斷局面，但始終都有一定年紀，要真正持續落去成為與「美朗」同級數球星似乎可能性太低。
除摩迪外，近年球壇其實有唔少球星出現，有數位更被稱為「世三」球員。無獨有偶，數位被稱為「世三」或是被認定有潛力成為下一代球王嘅球星今夏都極有可能/已經轉會，而於現今球壇要收購此級數球員轉會費都定必過億，HOMME 就特別為大家盤點一下今夏嘅重磅轉會。
1. 夏薩特 Eden Hazard
年齡: 28
國籍: 比利時
現時球隊: 皇家馬德里
潛在下家: (已轉會)
轉會費: 1億歐元
轉會指數: 已落實
講起世三，大家腦海第一個浮現嘅球員定必為夏薩特。呢位前車路士球星近季表現持續出色，去季更可謂一夫當關，全季為球隊交出24個入球、19個助攻，帶領車路士殺入英超前四、足總盃決賽及捧走歐霸。皇家馬德里去季因C朗離隊，巴爾未能發揮應有水準下攻力大減，今夏不惜以高達1億歐元帶走合約期只剩一年嘅夏薩特。夏薩特早已明言加盟銀河艦隊為其夢想，相信下季夏神若可於西甲賽場重現於英超時期嘅高效進攻效率，定必可帶領經歷一個失敗球季嘅皇馬重返輝煌。
2. 基沙文 Antoine Griezmann
年齡: 28
國籍: 法國
現時球隊: 馬德里體育會(已宣佈離隊)
潛在下家: 巴塞隆拿
轉會費: 預計1.2億歐元(違約金)
轉會指數: ★★★★★
除夏薩特外，基沙文亦為一位難得近季都表演出色嘅球員，亦係馬體會既頭號主力。呢位法國前鋒去年除助馬體會捧起歐霸盃外，更帶領法國奪得世界盃，於金球獎只得第三名時就曾表示「已經不知道要贏什麼才可贏得金球獎。」可見其有成為世界最佳嘅自信。基沙文其實去年轉會窗就曾被指或會轉會巴塞，不過其後就表示將會繼續效忠馬體會，可惜今季亦未能令球會再進一步。今年5月基沙文就正式宣佈會離隊，外間一直就盛傳基沙文將會於今夏真正轉投巴塞，只待7月1日解約金降至1.2億歐時就會正式落實。不過有報導指巴塞內部認為基沙文去年曾戲弄球隊，不支持呢位法國球員來投，反寧願要舊隊友尼馬回歸。到底早早宣佈離隊嘅基沙文去向會如何呢？
3. 尼馬 Neymar
年齡: 27
國籍: 巴西
現時球隊: 巴黎聖日耳門
潛在下家: 巴塞隆拿
轉會費: 預計1億歐元 + 拿傑錫迪、奧士文尼迪比利、烏姆迪迪(約值1.5億歐元)
轉會指數: ★★★☆☆
當年巴塞嘅「MSN」組合曾令各隊後衛聞風喪膽，但尼馬就因不滿要屈居於美斯之下而自行要求離隊拆散此恐怖攻擊組合，而及後更因850萬歐元「忠誠金」問題與巴塞不歡而散，甚至對簿公堂。自尼馬轉投巴黎起，PSG於法甲可謂更加所向披靡，但於球會最重視嘅歐聯賽事都未再有突破。有指PSG對尼馬每年於歐聯重要時候都受傷，以及場外種種行為不當等已經忍無可忍，而尼馬自身亦因麥巴比掘起威脅自己「球會大哥」位置而有意離隊，重返巴塞自然成熱門之選。近日有報導就指尼馬願意大幅減薪回歸巴塞再組「MSN」組合，而巴塞雖然都有意簽回尼馬衝擊歐聯，但由於其高昂身價或需以陣中數位球星作交易籌碼之一，若最後完成交易或許比當年普巴回歸曼聯之「回家轉會」花費更加鉅大。
4. 普巴 Paul Pogba
年齡: 26
國籍: 法國
現時球隊: 曼聯
潛在下家: 皇家馬德里/祖雲達斯
轉會費: 預計1.35億歐元
轉會指數: ★★★☆☆
講到數位具有能力或潛力嘅巨星，但最不獲球迷支持的必定是普巴。普巴與基沙文一樣都於去年帶領法國勇奪世盃，並於世界盃比賽展示其世界一級中場之功架。不過回到球會後，普巴似乎未有太大動力為曼聯付出，與摩佬不和其間更明顯「Hea踢」，與摩佬出走後之大爆發可謂完全兩種不同表現。無可否認普巴於現今球壇能力絕對是頂級之一，但其踢波態度及場邊表演就備受批評。早前施丹上任後普巴公然向皇馬放秋波已令球迷及董事會不滿，而近日高調指自己希望尋求新挑戰更令唔少紅魔球迷要求佢盡早走人。據報現時銀河艦隊及老東家祖雲達斯都有意收購普巴，但於轉會費上面碰到阻礙並未有下一步行動，而蘇斯克查則極希望可以留住普巴作重建之核心，今夏轉會機會率可算係50/50。
5. 戴巴拿 Paulo Dybala
年齡: 25
國籍: 阿根延
現時球隊: 祖雲達斯
潛在下家: 曼聯/利物浦/國際米蘭/拜仁
轉會費: 預計1.05億歐元
轉會指數: ★★☆☆☆
與上述數位球星比較，戴巴拿嘅轉會傳聞較不明朗，多間球會都曾被指對其有興趣。戴巴拿因為其俊俏面孔加上其出色球技曾被唔少人寄予厚望，而前季為祖記貢獻22個入球更令其身價上昇。去年C朗轉投祖雲達斯時曾經大家都非常期待兩人之配合，但明顯地效果不如理想，更直接壓縮到戴巴拿之表現及上陣時間，去季只為祖記交出10個入球，於唔少關鍵比賽更只能擔任後備。隨住藍斯來投，祖記亦盛傳對伊卡迪及普巴有意，預計戴巴拿於「班馬兵團」之前景並不明朗，不過目前暫未有一支球隊明顯表示有意簽入呢位阿根延新希望。
總結
除上述五位外，其實唔少大牌球星如古天奴、艾歷臣、丹比利、巴爾等都有於今夏傳出轉會新聞，於現今瘋狂嘅市場轉會費亦極有機會破億。不過目前除夏神一宗落實交易、基沙文督定離隊外其餘轉會都未算到最後階段，有部分傳會極有可能會造成連鎖效應，故今個夏天轉會窗絕對有可能為近年其中一個最瘋狂之轉會市場，大家可以繼續留意到最後。
