今夜歐聯將上演四強第二回合大戰，首回合輸三球嘅利物浦將重返晏菲路迎戰巴塞，務求絕地反擊。
是次大戰焦點除咗有沙拿、費明奴因傷未能上陣外，倒戈嘅蘇亞雷斯亦成重點。「哨牙蘇」上場於魯營入球後除剷草慶祝外，亦不停挑釁紅軍球員，令一眾球迷大感不滿，更指蘇亞雷斯於紅軍已經地位全無。
蘇亞雷斯於賽前訪問時就大談對紅軍看法 :「我非常享受於利物浦嘅時間，非常感激球隊給予我嘅一切，感謝利物浦令我成為頂級足球員，更成為球隊隊長。」
另外，蘇亞雷斯又談及第一回合對陣老東家慶祝，佢表示「相信熟悉足球嘅人都會理解係歐聯四強入波嘅意義。當時我為入球與球迷慶祝，希望向利迷道歉。我對利物浦仍非常尊重，若今晚再有入球我將不會用同樣方式慶祝，正如於其他賽事作客舊隊一樣。以我對利軍嘅貢獻，我預期掌聲絕對會比噓聲多。」
蘇亞雷斯自2011年加盟利物浦後共為紅軍上陣110場攻入69球，更曾於13-14年球季以一己之力帶領利物浦衝擊英超冠軍，可惜最後因為謝拉特…… 上場過後「哨牙蘇」已經被紅軍球迷稱為「叛徒」，大家又認為會否真係掌聲比噓聲多呢？
