據外媒透露，拜仁目前並無意於季後正式收購皇馬借將占士洛迪古斯，呢位哥倫比亞中場將於下月15日離開拜仁重返班拿貝。不過由於施丹並無意將佢納入下季陣容之中，當年以天價轉會嘅占士或將再成人球。
近日 Daily Mail 報導，由於尼馬經常受傷，而賽季末更有紀律問題，PSG已經再不會將佢定位為「非賣品」，而占士洛迪古斯就被該法甲班霸認定為可頂替尼馬嘅球星之一。眾所周知皇馬一直都對呢位前巴塞球員有濃厚興趣，若巴黎真有意收購占士嘅話，將占士納入交易一部分絕對係三贏局面。
除咗巴黎聖日耳門外，祖雲達斯、阿仙奴亦被指對占士洛迪古斯有興趣。不過無論如何，相信占士於皇馬嘅日子已經進入倒數。由於收購尼馬定必所費不菲，皇馬今夏又定必需大灑金錢加強陣容，若將呢位哥倫比亞巨星加入交易確實為一個不錯嘅轉會操作。
