英超昨夜上演重要戲碼，力爭奪冠嘅曼城以1:0擊敗李斯特城，隊長甘賓尼世界波成唯一入球！
今場曼城只要贏波就可以力保捧盃主動權，由開賽開始已經不停尋找入波機會，全場有高達19次埋門。而客隊李斯特城今場防守穩健，曼城久久都未能先開記錄。直到70分鍾，隊長甘賓尼於禁區外狂轟火箭式遠射直飛死角，成全場唯一入球，亦令曼城於最後一輪前可掌控英超冠軍。
甘賓尼更笑指射門前聽到隊友不停叫佢「別射門」，而呢位隊長就用行動證明自己仍然有能力。呢個入球對甘賓尼意義極大，除咗為佢今屆英超首個入球外，原來亦係自2013年起甘賓尼首個於禁區外中龍埋門。
有人指呢個入球將成甘賓尼於曼城最後一個入球，因為佢同球隊嘅合約將於今季尾到期。賽後哥迪奧拿就未有明確答覆會否同呢位比利時鐵衛續約，只係表示於季尾會同甘賓尼及其經理人再討論。現時曼城只要於下輪再贏波就可以肯定再捧英超，單單係呢個入球相信都有足夠理由說服藍月亮再續甘賓尼。
